Започна расчистувањето на дивата депонија  ”Мауцкер” кај Охрид

Започна првата фаза од  расчистувањето на  депонијата  ”Мауцкер”, на самиот влез од Охрид, каде во иднина е планиранo да се префрли ЈП ”Охридски Комуналец”  и  да се изгради стационар за бездомните кучиња.

Според надлежните, ова е  почеток  за решавање на проблемите со дивите депонии кои никнуваат на секој чекор во градот.

Се планира порамнување на околу 16.000 метри квадратни површина на која воглавном е одлаган градежен шут, како и дислоцирање на истиот на друга локација во рамките на депонијата ”Мауцкер”.

Од ”Охридски комуналец” најавуваат дека после завршувањето на активностите со расчистување, во иднина ќе се води повеќе грижа и нема да се дозволи повторно одлагање на сметот на оваа локација.

И градоначалникот на Охрид смета дека со отпочнување на вакви активности, се решава еден од најгорливите проблеми на градот, справувањето со дивите депонии.

Расчистувањето на депонијата  финансиски е поддржано од Министерството за животна средина и просторно планирање, во чии рамки е предвидено уредување на осум вакви локации.